ಚಿತ್ರದುರ್ಗ: ತೀವ್ರ ಜಿದ್ದಾಜಿದ್ದಿಗೆ ಕಾರಣವಾಗಿದ್ದ ತಾಲ್ಲೂಕು ಗುತ್ತಿಗೆದಾರ ಸಂಘದ ಪ್ರಮುಖ ಸ್ಥಾನಗಳಿಗೆ ರಾಜ್ಯಾಧ್ಯಕ್ಷ ಆರ್.ಮಂಜುನಾಥ್ ಮಧ್ಯಪ್ರವೇಶದಿಂದ ಅವಿರೋಧ ಆಯ್ಕೆ ನಡೆಯಿತು.
ಜಾನಕೊಂಡ ಮಾರ್ಗದ ರಂಗನಾಥಸ್ವಾಮಿ ಬೆಟ್ಟದ ಆವರಣದಲ್ಲಿ ಭಾನುವಾರ ಆಯೋಜಿಸಿದ್ದ ಆಯ್ಕೆ ಪ್ರಕ್ರಿಯೆಯಲ್ಲಿ ಆರ್.ಮಂಜುನಾಥ್ ಅವರು ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಂಡು ಅವಿರೋಧ ಆಯ್ಕೆ ನಡೆಸಿದರು.
ಮೂರು ವರ್ಷಗಳ ಅವಧಿಗೆ ಆಯ್ಕೆಯಾದ ನೂತನ ಪದಾಧಿಕಾರಿಗಳ ವಿವರ:
-
ಅಧ್ಯಕ್ಷರು: ಕಾಟೇಹಳ್ಳಿ ಕರಿಯಪ್ಪ
-
ಪ್ರಧಾನ ಕಾರ್ಯದರ್ಶಿ: ಮೈಲಾರಪ್ಪ
-
ಖಜಾಂಚಿ: ಪ್ರವೀಣ್
ಬಳಿಕ ಮಾತನಾಡಿದ ಮಂಜುನಾಥ್, “ಚುನಾವಣೆಗಳು ಪರಸ್ಪರ ದ್ವೇಷ, ಅಸೂಯೆಗೆ ಕಾರಣವಾಗುತ್ತದೆ. ಪರಸ್ಪರ ಒಗ್ಗೂಡಿ ಅವಿರೋಧ ಆಯ್ಕೆ ಪ್ರಕ್ರಿಯೆ ನಡೆಸುವುದರಿಂದ ಸಂಘದ ಬೆಳವಣಿಗೆಗೆ ಸಹಕಾರಿ ಆಗಲಿದೆ,” ಎಂದರು.
“ಗುತ್ತಿಗೆದಾರರ ಸಮಸ್ಯೆಗಳು ಅನೇಕ ಇವೆ. ಅವುಗಳನ್ನು ಬಗೆಹರಿಸಲು ತಾಲ್ಲೂಕು ಮಟ್ಟದಿಂದ ರಾಜ್ಯಮಟ್ಟದ ಘಟಕದವರೆಗಿನ ಪದಾಧಿಕಾರಿಗಳು ಒಗ್ಗೂಡಿ ಜವಾಬ್ದಾರಿ ನಿರ್ವಹಿಸಬೇಕು. ಸರ್ಕಾರದ ಮೇಲೆ ಒತ್ತಡ ತಂದು ಕಾಮಗಾರಿ ಬಾಕಿ ಹಣ ಬಿಡುಗಡೆಗೆ ಶ್ರಮಿಸಬೇಕಿದೆ,” ಎಂದು ತಿಳಿಸಿದರು.
ಮುಂದುವರಿದು, “ರಾಜ್ಯದಲ್ಲಿ ತೀವ್ರ ಸಂಕಷ್ಟಕ್ಕೆ ಸಿಲುಕಿರುವ ವರ್ಗವೇ ಗುತ್ತಿಗೆದಾರರು. ಅವರ ಹಿತದ ಜೊತೆಗೆ ಕಾಮಗಾರಿ ನಡೆಸಿದ್ದಕ್ಕೆ ಪ್ರತಿಯಾಗಿ ಹಣ ಕಾಲಕಾಲಕ್ಕೆ ಸರ್ಕಾರ ನೀಡುವಂತೆ ಒತ್ತಡ ತರಬೇಕಿದೆ. ಈಗಾಗಲೇ ಈ ನಿಟ್ಟಿನಲ್ಲಿ ಕಾರ್ಯಾನ್ಮುಖನಾಗಿದ್ದೇನೆ,” ಎಂದರು.
ಈ ಸಂದರ್ಭದಲ್ಲಿ ಜಿಲ್ಲಾಧ್ಯಕ್ಷ ಕೆ.ಮಲ್ಲೇಶ್, ವಕ್ಫ್ ಬೋರ್ಡ್ ಮಾಜಿ ಅಧ್ಯಕ್ಷ ಅನ್ವರ್ ಭಾಷಾ, ರಮೇಶ್, ಲಕ್ಷ್ಮಣ್ ಸೇರಿದಂತೆ ಇತರರು ಉಪಸ್ಥಿತರಿದ್ದರು.
