ಸಿರಿಗೆರೆ: ಚಿತ್ರದುರ್ಗ ಜಿಲ್ಲೆಯ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಬರುವ ಕಾತ್ರಾಳು ಕೆರೆಯಿಂದ ಹತ್ತಾರು ಗ್ರಾಮಗಳಿಗೆ ನೆರವಾಗುವ ಜಿನಿಗಿ ಹಳ್ಳಕ್ಕೆ ನೀರು ಹರಿಸಲು ನೆರವಾಗಬೇಕಾಗಿ ತುರುವನೂರು ಹೋಬಳಿ ವ್ಯಾಪ್ತಿಯ ಹತ್ತಾರು ಗ್ರಾಮಗಳ ರೈತರು ತರಳಬಾಳು ಪೀಠದ ಶಿವಮೂರ್ತಿ ಶಿವಾಚಾರ್ಯ ಸ್ವಾಮಿಜಿಯವರಲ್ಲಿ ಮನವಿ ಮಾಡಿದರು.
ಹೌದು, ಸೋಮವಾರ ಮಠದ ಸದ್ಧರ್ಮ ನ್ಯಾಯಪೀಠಕ್ಕೆ ಆಗಮಿಸಿದ ನೂರಾರು ರೈತರು ಶ್ರೀಗಳನ್ನು ಭೇಟಿ ಮಾಡಿ ತಮ್ಮ ಅಹವಾಲು ಸಲ್ಲಿಸಿದರು. ಮಳೆಯ ಕೊರತೆಯಿಂದ ಬರಗಾಲ ತೀವ್ರವಾಗಿ ಕಾಡುತ್ತಿದ್ದು, ಆಶಾದಾಯಕವಾಗಿದ್ದ ಮೆಕ್ಕೆಜೋಳ ಹಾಗೂ ಮುಂಗಾರು ಪೈರುಗಳು ಸಂಪೂರ್ಣ ನಾಶವಾಗಿವೆ. ಕುಡಿಯುವ ನೀರಿನ ಬವಣೆ ಹಳ್ಳಿಗಳಲ್ಲಿ ವ್ಯಾಪಿಸುತ್ತಿದ್ದು, ಜಾನುವಾರುಗಳ ರಕ್ಷಣೆ ತೀರಾ ಕಷ್ಟವಾಗುತ್ತಿದೆ. ಆದ್ದರಿಂದ ಜಿನಿಗೆ ಹಳ್ಳಕ್ಕೆ ನೀರು ಹರಿಸಲು ಅಧಿಕಾರಿಗಳಿಗೆ ಸೂಚಿಸುವಂತೆ ಕೋರಿದರು.
ಇನ್ನು, ಭರಮಸಾಗರ ಏತ ನೀರಾವರಿ ಯೋಜನೆ ವ್ಯಾಪ್ತಿಗೆ ಬರುವ ಕಾತ್ರಾಳು ಕೆರೆಯಲ್ಲಿ ಲಭ್ಯವಿರುವ ನೀರನ್ನು ಕೋಡಿಯ ಮೂಲಕ ಹರಿಸಿಕೊಡಿ ಎಂಬುದು ರೈತರ ಪ್ರಾರ್ಥನೆಯಾಗಿತ್ತು.
ಭದ್ರಾ ಮೇಲ್ಡಂಡೆಯ ನೀರು ನಮಗೆ ಆಧಾರ
ಮೂಲ ಯೋಜನೆಯಲ್ಲಿ ಕಾತ್ರಾಳು ಕೆರೆಗೆ ಭದ್ರಾ ಮೇಲ್ಡಂಡೆ ಯೋಜನೆಯ ನೀರು ಬರಬೇಕಿತ್ತು. ಆದರೆ, ತಾಂತ್ರಿಕ ಕಾರಣಗಳಿಂದ ಅದು ಸಾಧ್ಯವಾಗಿಲ್ಲ. ತರಳಬಾಳು ಶ್ರೀಗಳು ದೃಷ್ಟಿ ಹಾಯಿಸಿದರೆ ಆ ಕೆಲಸವೂ ಸಹ ಬೇಗನೇ ಆಗಲಿದ್ದು, ಆದ್ದರಿಂದ ಭದ್ರಾ ಮೇಲ್ಡಂಡೆ ಯೋಜನೆಯ ನೀರನ್ನು ಕಾತ್ರಾಳು ಕೆರೆಗೆ ತರುವಂತೆ ಶ್ರೀಗಳಲ್ಲಿ ಅರಿಕೆ ಮಾಡಿಕೊಂಡಿದ್ದೇವೆ ಎಂದು ರೈತ ಮುಖಂಡ ಚಿಕ್ಕಪ್ಪನಹಳ್ಳಿ ರುದ್ರಸ್ವಾಮಿ ತಿಳಿಸಿದರು.
ರುಮ್ಮಾಗಟ್ಟೆ, ಪಾಪೇನಹಳ್ಳಿ, ವಡ್ಡನಹಳ್ಳಿ, ರಾಯನಹಳ್ಳಿ, ಸುಲ್ತಾನಿಪುರ, ಚಿಕ್ಕಪ್ಪನಹಳ್ಳಿ, ಸೂರನಹಳ್ಳಿ, ಮುದ್ದಾಪುರ, ಚಿಪ್ಪನಕೆರೆ, ಚಿಕ್ಕಗೊಂಡನಹಳ್ಳಿ, ಯಳಗೋಡು, ಮಾಡನಾಯಕನಹಳ್ಳಿ ಮುಂತಾದ ಗ್ರಾಮದ ರೈತರು ಶ್ರೀಗಳನ್ನು ಭೇಟಿ ಮಾಡಿದ್ದರು.
ಇನ್ನು ಈ ವೇಳೆ ರೈತ ಸಂಘದ ಪದಾಧಿಕಾರಿಗಳಾದ ಬಾಬು ರೆಡ್ಡಿ, ಬಸ್ತಿಹಳ್ಳಿ ಸುರೇಶ್‌ ಬಾಬು, ಆರ್.ಸಿ. ಅಜ್ಜಪ್ಪ, ಆರ್. ಬಸವರಾಜ್‌, ಟಿ. ತಿಪ್ಪೇಸ್ವಾಮಿ ಹಾಗೂ ನೂರಾರು ರೈತರು ಹಾಜರಿದ್ದರು.
